ஈத் முபாரக்

அஸ்ஸலாமு அலைக்கும் (வரஹ்)...

இஸ்லாத்தின் ஐம்பெரும் கடமைகளில் ஒன்றான ரமலான் மாதத்தில் நோன்பு நோற்று நன்றி செலுத்தும் நன்னாளான ஷவ்வால் முதல் நாள் ஈகைத்திருநாள் ரமலான் பெருநாள் பண்டிகை இன்று கொண்டாடப்படுகிறது.


புத்தாடை அணிந்து ஏழை எளியவர்களுக்கு ஜகாத் என்னும் தானதர்மங்களை வழங்கும் இந்நன்னாளில் நாம் அனைவரும் ஒற்றுமையாக சாதிமத பேதங்களை மறந்து எல்லோரும் ஒற்றுமையாக இருக்க எல்லோருக்கும் நல்லமனதை நம் இறைவன் தந்தருள்வானாக.. ஆமீன்..

அனைவருக்கும் என் இனிய ஈகைத் திருநாள் வாழ்த்துகள்..



,

Read More

நோன்பு கஞ்சியும் வெங்காய வடை

அஸ்ஸலாமு அலைக்கும் (வரஹ்).

நோன்பு இப்போதான் ஆரம்பித்தமாதிரி இருந்தது... அதற்குள் இந்த ரமலான் மாதம் இன்னும் இரண்டு தினங்களில் முடியப்போகிறது. நோன்பு கஞ்சி வைக்க ரொம்ப நாளா ஆசை. அதுபற்றி எனக்கு அவ்வளவாக தெரியாது.. அப்போ
என் மாமி, பரவாயில்ல.. நீ நோன்பு கஞ்சி செய்.. நானும் எனக்கு தெரிந்தஅளவுக்கு சொல்லித் தருகிறேன் என்று சொல்லி கஞ்சி செய்ய சொல்லித் தந்தார்.

நோன்பு கஞ்சி செய்ய தேவையான பொருட்கள்:


பாசுமதி அரிசி 1 கப்
வெங்காயம் 1
தக்காளி 1
மிளகாய் 1
இஞ்சிப்பூண்டு பேஸ்ட் 2 ஸ்பூன்
பூண்டு 4
சீரகம் 1 ஸ்பூன்
வெந்தயம் 1 ஸ்பூன்
பால் 2 கரண்டி
அண்டிப்பருப்பு சிறிதளவு
மேகி மசாலா 1 பாக்கெட்
மல்லிக்கீரை சிறிதளவு..
புதீனா 1 இணுக்கு
உப்பு தேவையான அளவு.
எண்ணெய் 2 ஸ்பூன்

முதலில் பாசுமதி அரிசியை மிக்ஸியில் போட்டு அரிசி உடைந்து துகள்களாக ஆகுமளவுக்கு பொடித்து ஒரு 10 நிமிடம் ஊறவைக்க வேண்டும்.

ஒரு பாத்திரத்தில் தண்ணீர்விட்டு கொதிக்க வைக்க வேண்டும். தண்ணீர் கொதித்ததும் அரிசியை போடவேண்டும்.

2ஸ்பூன் எண்ணெய் விட்டு கொதிக்கும்போது பொடியாக நறுக்கிய வெங்காயம் , சீரகம், வெந்தயம், நசுக்கிய முழுபூண்டு, இஞ்சிப்பூண்டு பேஸ்ட் எல்லாவற்றையும் சேர்த்துப்போட்டு கொதிக்கவைக்க வேண்டும்.

தண்ணீர் வற்றவற்ற தண்ணீர் சேர்த்துக் கொள்ளவேண்டும். பின்னர் மிளகாய், தக்காளி, மேகி மசாலா, பால், மல்லிப்புதினா, அண்டிப்பருப்பு, உப்பு சேர்த்து நன்றாக கொதிக்க வைக்கவேண்டும்.

தண்ணீர் வற்றவற்ற தண்ணீர் சேர்த்து நன்றாக கொதிக்க வைக்க வேண்டும். கஞ்சி நன்றாக கெட்டியாக வந்ததும் இறக்கி ஆறவைக்க வேண்டும்.

இப்போது சுவையான கஞ்சி ரெடி..

இதற்கு சுவையாக தொட்டுக்க தேங்காய்ச் சட்டினி அல்லது தக்காளி சட்டினி தயார் செய்து நோன்பு திறக்கலாம்.

******************

வெங்காய வடை தயார் செய்ய தேவையான பொருட்கள்..


பல்லாரி வெங்காயம் 3மிளகாய் 1
முட்டை 1
இஞ்சிப்பூண்டு பேஸ்ட் 1 ஸ்பூன்
மல்லிக்கீரை சிறிதளவு
சோடாஉப்பு அரைக்கால் சிறிய ஸ்பூன்.. சிறிதளவிலும் சிறிதளவு.. கூடிவிடக்கூடாது.. பின்ன, வடை கல்லுமாதிரி ஆகிடும்.கடலை மாவு தேவையான அளவு
உப்பு சிறிதளவு..

ஒரு கிண்ணத்தில் வெங்காயத்தை பொடியாக ஆம்லேட்டுக்கு நறுக்குவதுபோல நறுக்கிவைத்துக் கொள்ளவேண்டும்.

மிளகாய், மல்லிக்கீரையை பொடியாக நறுக்கி முட்டையில் உள்ள வெள்ளைக்கருவை மட்டும் சேர்க்க வேண்டும்.

இஞ்சிப்பூண்டு பேஸ்ட், உப்பு, சோடாஉப்பை தூவி மாவைக் கொட்டி பிசைய வேண்டும்.

கலவையை மாவுபக்குவமாக்கிக் கொள்ளவேண்டும்.

வாணலியில் எண்ணெய்விட்டு மாவுக்கலவையை சிறிதுசிறிதாக போட்டு பொறித்து வைக்கவேண்டும்.

சுவையான வெங்காய வடை ரெடி..




எல்லோருக்கும் என் இனிய ரமலான் வாழ்த்துகள்..

,

Read More

பதிவுலகில் மின்மினி

ஸாதிகா அக்கா அன்போடு அழைத்த தொடர் இடுகை.. அவருக்கு என் நன்றிகள்.


1) வலைப்பதிவில் தோன்றும் உங்கள் பெயர்?.

மின்மினி

2) அந்தப்பெயர் தான் உங்கள் உண்மையான பெயரா? இல்லை எனில் பதிவில் தோன்றும் பெயரை வைக்க காரணம் என்ன?.

இல்லை. இந்த வலைப்பூ ஆரம்பிக்க என் கணவர்தான் காரணம். அவருக்கு பிடித்த பெயரான இந்த பெயரில் வலைப்பூ ஆரம்பித்து எழுத ஊக்கம் கொடுத்தார். எனக்கும் பிடித்திருந்தது.

3 ) நீங்கள் தமிழ் வலைப்பதிவு உலகில் காலடி எடுத்துவைத்ததைப் பற்றி...

சும்மா ஆரம்பித்ததுதான்.. சும்மா நேரம் கிடைக்கும்போது சில தளங்களை வாசிப்பேன். சிலர் ரொம்ப நல்லா எழுதுவாங்க.. படிக்க சுவாரசியமாக இருக்கும்.. இதுபோல நாமும் எழுதுவோமே என்று ஆரம்பித்ததுதான்..

4) உங்கள் வலைப்பதிவை பிரபலமடையச் செய்ய என்ன என்னென்னவெல்லாம் செய்தீர்கள்?

நம்முடைய எழுத்துக்களை பிறரிடம் கொண்டு சேர்ப்பது திரட்டிகள்தான்.. மின்மினிக்கும் இத்தனை நண்பர்கள் இருக்கிறார்கள் என்றால் திரட்டிகள்தான் காரணம். தமிழ்மணம், இன்டலியில் மட்டுமே இணைத்துள்ளேன். திரட்டிகளுக்கு என் நன்றிகள்.

5) வலைப்பதிவின் மூலம் உங்கள் சொந்த விஷயத்தை பகிர்ந்துகொண்டதுண்டா? ஆம் என்றால் ஏன்?அதன் விளைவு என்ன? இல்லை என்றால் ஏன்?

சொந்த அனுபவங்களை பகிர்ந்து கொள்ளும்போது மன‌துக்கு ஒரு மகிழ்ச்சி கிடைக்கிறது. என்னுடைய சில அனுபவங்களை பகிர்ந்து கொண்டுள்ளேன்.

6) நீங்கள் பொழுதுபோக்குக்காக பதிவுகளை எழுதுகிறீர்களா அல்லது பதிவுகளின் மூலம் சம்பாதிப்பதற்காகவா?..

வீட்டில் நேரம் கிடைக்கும்போது எழுதுவேன்.. இதன்மூலம் சம்பாதித்ததெல்லாம் கிடையாது.. அப்படி எல்லாம் இருக்கிறதா.. இருந்தா சொல்லுங்க.. ஏன்னா நான் புதுசு. என்ன ஒன்று.. நண்பர்களாக உங்களையெல்லாம் பெற்றிருப்பதைவிட சம்பாத்தியம் என்ன சம்பாத்தியங்க.

7) நீங்கள் மொத்தம் எத்தனை வலைப்பதிவுகளுக்கு சொந்தக்காரர்? அதில் எத்தனை தமிழ் வலைப்பதிவுகள் உள்ளன?

ஒண்ணே ஒண்ணு கண்ணே கண்ணுன்னு ஒன்றுதான் வைத்திருக்கிறேன்.. இந்த மின்மினியின் சிந்தனைகள் மட்டுமே..

8) மற்ற பதிவர்கள் மீது எப்போதாவது உங்களுக்கு கோபம் அல்லது பொறாமை ஏற்பட்டது உண்டா? ஆம் என்றால் யார் அந்த பதிவர்? ஏன்?..

எல்லோரையும் போல நானும் வித்தியாசமாக எழுதவேண்டும் என்ற ஆவல். கோபமெல்லாம் கிடையாதுங்க..

9) உங்கள் பதிவை பற்றி முதன் முதலில் உங்களை தொடர்புகொண்டு பாராட்டிய மனிதர் யார்? அவரைப் பற்றி, அந்த பாராட்டைப் பற்றி..

முதன்முதலில் என்எழுத்தை பாராட்டியவர் என் கணவர். அவர் எனக்கு தினமும் சிலபல கருத்துக்களை பகிர்ந்து கொள்வார். அவருக்கு என் முதல் நன்றி.. நான் நுழைவாயிலில் நுழைந்தபோது பாராட்டியவர் ஜலீலாக்கா.. எனக்கு முதன்முதலாக விருது கொடுத்து பாராட்டியவர் ஸ்டார்ஜன். ஜெய்லானி, அக்பர் அண்ணன், ஸாதிகா அக்கா, மகராசன் சார், துபாய் ராஜா சார், ஆசியாக்கா, நிஜாமுதீன், மலிக்கா அக்கா, ஹூசைனம்மா, ஸ்டீபன்
எல்கே, மற்றும் இப்போதும் வாழ்த்துகின்ற நீங்கள்.

ஒருவரை நல்லாயிரு என்று என்றுசொல்லி வாழ்த்துவது அவரை மேலும் மேலும் உற்சாகப்படுத்தும். உங்களுடைய ஒவ்வொரு கருத்துக்களும் என்னை மேலும் சிறப்பாக எழுத வைக்கும்.

என்னை பெரிதும் கவர்ந்த கமாண்ட் மலிக்கா எழுதிய கமாண்ட் என்னை இப்போதும் "எழுது மின்மினி எழுது" என்று உற்சாகப்படுத்திக் கொண்டிருக்கிறது.

அன்புடன் மலிக்கா said...

நம் எண்ணங்களில் உதிக்கும் அத்தனையும் எழுத்துக்களாய் கொண்டுவருதல் சிறப்பு.

வலைகுள் புகுந்தாச்சில்ல இனி பின்னிடுங்க மின்மினி.உங்களுக்கெல்லன்று ஒரு வலையை மின்மினி வலை..

மின்மினி
வெளிச்சம்தரும் மின்மினியாய் மட்டும் இல்லாமல். ஒளிவீசும் நட்சத்திரமாய் ஜொலிக்க வாழ்த்துக்கள்.

சந்தேகளிருப்பின் தயங்காமல் கேட்கவும். எனக்குதெரிந்தவரை சொல்லித்தருகிறேன்.

ம்ம் தொடருங்கள் யாரங்கே அடியுங்கள் மேளத்தை .மின்மினியின் வருகையை மற்றவலைதளங்களுக்கு கேட்கும்படி..
March 28, 2010 8:07 AM .


ரொம்ப மகிழ்ச்சியாக சந்தோசமாக இருக்கிறது மலிக்கா அக்கா. ரொம்ப நன்றி.

உங்கள் அனைவருக்கும் மிக்க நன்றிகள்.

10) கடைசியாக----விருப்பம் இருந்தால் உங்களைப் பற்றி பதிவுலகத்துக்கு தெரிய வேண்டிய அனைத்தையும் பற்றி கூறுங்கள்...

நான் இப்போதுதான் எழுத ஆரம்பித்துள்ளேன். இனிவரும் காலங்களில் என்னை பற்றி கட்டாயம் குறிப்பிடுவேன்.


இந்த தொடரிடுகையை எல்லோரும் எழுதி விட்டார்கள் என்று நினைக்கிறேன். யாரும் எழுதவில்லை என்றால் இதனை அழைப்பாக ஏற்றுக்கொண்டு எழுதுங்கள்.

மலிக்கா அக்கா, ஜலீலாக்கா அவர்களை அன்போடு அழைக்கிறேன்.


அன்புடன் மின்மினி.

,

Read More

ருசியான தக்காளி ரசம்

மின்மினி எழுதும் அன்பு மடல்.. எல்லோரும் எப்படி இருக்கீங்க.. ரொம்ப நாளாச்சி உங்களையெல்லாம் சந்தித்து ஒரு இரண்டு மாதங்களுக்கு மேலிருக்கும் என்று நினைக்கிறேன்.. எழுதவேண்டும்.. உங்களையெல்லாம் சந்திக்கவேண்டும் என்ற ஆவல் மட்டும் மனதில் அடிக்கடி ஒலித்துக்கொண்டே இருக்கிறது.. அதற்கான சந்தர்ப்ப சூழ்நிலைகள் வாய்ப்பது ரொம்ப அரிதாகவே இருக்கிறது.. தொடர்ந்து எழுத முயற்சி செய்து கொண்டிருக்கிறேன்.

நாம் அன்றாடம் உபயோகிக்கும் பொருட்களில் நிறைய‌ மருத்துவகுணங்கள் இருக்கின்றன. அன்றாட உணவில் சேர்க்கும் பொருட்கள் நம் உடலுக்கும் ஆரோக்கியத்துக்கும் பாதுகாத்து உடல் வளர்ச்சிக்கு முக்கிய பங்காற்றுகின்றன.

சாதாரண தக்காளி ரசம் வைப்பது பற்றியும் அதில் சேர்க்கும் பொருட்களின் மருத்துவகுணங்கள் பற்றியும் இப்போது நாம் காணலாம்.

தக்காளி ரசம்
============

தேவையானவை

கடுகு உளுந்தம்பருப்பு ‍_ சிறிதளவு 1/2 ஸ்பூன்
வெங்காயம் _ சிறிதளவு
கறிவேப்பிலை _ 2 இணுக்கு
மிளகாய் வற்றல் _ 3
தக்காளி _ 2
புளி _ சிறிதளவு
சீரகம் பெருஞ்சீரகம் _ 1/2 ஸ்பூன்
மிளகு _ 1/2 ஸ்பூன்
உப்பு தேவைக்கேற்ப‌

முதலில் தக்காளியை நறுக்கி வைத்துக் கொள்ளவும். மிளகு சீரகத்தை பொடித்து வைத்துக்கொள்ள‌வும்..

தாளிக்க வேண்டிய பொருட்களான கடுகு உளுந்தம்பருப்பு வெங்காயம் கறிவேப்பிலை மிளகாய்வற்றல் ஆகியவற்றை கருகிவிடாமல் பொன்னிறமாக தாளித்து வைத்துக்கொள்ள வேண்டும். பின்னர் தக்காளி சேர்த்து நன்றாக வதக்கி கொள்ள வேண்டும்.

புளியை தண்ணீரில் கரைத்து தக்காளி கலவையுடன் சேர்த்து பொடித்த மிளகு சீரகத்தை சேர்த்து இறக்கிவிடவேண்டும்.

கடுகு _ கால்வலி, கால் உளைச்சலுக்கு நல்லது.
வெங்காயம் _ தலைவலி, ஜலதோசத்துக்கு நல்லது.
மிளகு _ வாய்ப்புத் தொல்லை நீக்கும்.
தக்காளி _ ரத்த ஓட்டம் அதிகரிக்கும்.
சீரகம், பெருஞ்சீரகம் _ உடல் உஷ்ணம் தீர்க்கும்.
புளி, உப்பு _ சுவைக்கு

அன்புடன் மின்மினி.

,

Read More

யூத்புல் விகடனுக்கு நன்றிகள்

அன்புமிக்க தோழ தோழியர்களே!! உங்கள் அனைவருக்கும் முதலில் ஸலாம் சொல்லிக் கொள்கிறேன். நான் நேற்று எழுதிய பஸ் பயணம்‍ - கவனிக்க என்ற இடுகையை யூத்புல் விகடனில் குட்பிளாக்ஸ் பகுதியில் நேற்று வெளியாகியிருக்கிறது. தேர்ந்தெடுத்த விகடன் குழுவினருக்கு என் நன்றிகளை தெரிவித்துக் கொள்கிறேன்.

எனது தளத்தில் இதுவரைக்கும் 15 இடுகைகளை எழுதி வெளியிட்டுள்ளேன். வலைப்பக்கம் எழுதவந்து இந்த இரண்டு மாதத்துக்குள் என் எழுத்தை பார்த்தும் படித்தும் ஆதரவுகொடுத்து வரும் உங்கள் அனைவருக்கும் நன்றிகள் சொல்ல கடமைப்பட்டுள்ளேன். எனக்கு இதுவரை 37 பாலோயர்கள் ஆனது மிக்க மகிழ்ச்சியாக உள்ளது.

எனக்கு எழுதுவதற்கு ஊக்கமும் கொடுத்து சிலபல கருத்துக்களை பகிர்ந்து கொள்ளும் எனது கணவருக்கு நன்றிகள்.

அதுபோல விருதுகள் கொடுத்து ஊக்குவித்த ஸ்டார்ஜன், ஸாதிகா அக்கா, அக்பர் அண்ணன், ஜெய்லானி, சைவகொத்துப்பரோட்டா, அஹமது இர்ஷாத் ஆகியோருக்கு என் நன்றிகள்.

மேலும் தினமும் என்தளத்துக்கு வருகைதந்து ஆதரவையும் பாராட்டுகளையும் கருத்துக்களையும் பகிர்ந்து கொள்ளும் அனைவருக்கும் நன்றிகள் பல.

யூத்புல் விகடனுக்கு என் நன்றிகளை தெரிவித்துக் கொள்கிறேன்.

யூத்புல் விகடனில் வெளியான பஸ் பயணம் கவனிக்க

மீண்டும் அனைவருக்கும் நன்றிகள்.

தொடர்ந்து உங்கள் ஆதரவை நாடும் உங்கள் மின்மினி.

,

Read More

பஸ் பயணம் - கவனிக்க

நானும் என்கணவரும் அம்மம்மா வீட்டுக்கு விருந்துக்கு தக்கலைக்கு அருகில் உள்ள ஊருக்கு செல்வதற்கு வீட்டிலிருந்து காலையில் 7 மணிக்கே கிளம்பினாலும் திருநெல்வேலி புதிய பேருந்து நிலையம் வருவதற்குள் எட்டுமணியாகிவிட்டது. பின்னர் அங்கிருந்த சிற்றுண்டி கடையில் சாப்பிட்டோம். சாவகாசமா நாகர்கோவில் பிளாட்பாரத்துக்கு வந்துப்பார்த்தால் கூட்டம் அலைமோதியது. என்னவென்று விசாரித்ததில் பணகுடியில் கோவில் கொடைவிழாவானதால் பஸ்கள் நிரம்பி வழிந்தன.

9.30 மணி தாண்டியும் கூட்டம் அதிகமானதே தவிர குறையவே இல்லை. என்கணவர் போறபோக்கை பார்த்தால் கூட்டம்குறைய வாய்ப்பில்லை. நாம் ஏறிக்கொள்வோம். என்று சொல்லி கூட்டத்தோடு கூட்டமாக ஏறிவிட்டோம். உட்கார இடம் இல்லை. நின்றுகொண்டே வந்தோம். திருநெல்வேலியிலிருந்து நாகர்கோவிலுக்கு 25 ரூபாய். பஸ் வேகமாக சென்றாலாவது நிற்கும் பீலீங் வராது. ஆனால் பஸ்ஸோ வெகுமெதுவாக சென்றது எரிச்சலாக இருந்தது. நான் வள்ளியூர் வந்ததும் இடம்கிடைத்து உட்கார்ந்தேன். என்கணவரோ ஆரல்வாய்மொழி வந்ததும்தான் உட்கார்ந்தார்.

தொலைதூரம் செல்ப‌வர்களை முதலில் உட்காரவைத்துவிட்டு பின்னர் மற்ற ஊர்களுக்கு செல்பவர்களுக்கு இடம் ஒதுக்கலாம். அல்லது இதுபோல‌ திருவிழா என்றால் அந்தஊருக்கு தனிபஸ் விடலாம். இதனால் தொலைதூரம் செல்பவர்கள் சிரமமில்லாமல் பயணிக்கலாம். போக்குவரத்துக் கழகங்கள், வசூல் கிடைக்கவேண்டும் என்பதற்காக இப்படி பயணிகளை அலைக்கழிக்கிறாங்களே.. கூடுதல் பஸ்கள் இயக்கினால் பயணிகளுக்கு சிரமமிருக்காது.

***********************************

ஒருதடவை எங்கஊருக்கு சென்றுவிட்டு திருநெல்வேலிக்கு திரும்ப‌ பஸ்கிடைக்கவில்லை. அப்போது சென்னை செல்லும் விரைவுபோக்குவரத்து கழக பஸ் வந்தது. எங்கவாப்பா நீங்க இரண்டுபேரும் இந்தபஸ்ல போங்க. வேற பஸ் கிடைக்கிறமாதிரி தெரியவில்லை என்று சென்னை பஸ்ஸில் ஏற்றிவிட்டார். அந்தபஸ் சொகுசுபேருந்து என்பதால் எந்த அசௌகரியமில்லாமல் இனிய பயணமாக இருந்தது.

நாங்கள் வந்தபஸ் திருசெந்தூரிலிருந்து நெல்லை வழியாக சென்னைக்கு செல்வதால் டீசல்போட நெல்லை டிப்போவுக்குள் சென்றது. அந்தசமயம் மார்த்தாண்டத்திலிருந்து சென்னை செல்லும் பஸ் டிப்போவுக்குள் நுழைந்தது. அப்போது அந்த டிப்போ ஊழியர் அந்தபஸ் டிரைவரிடம்,
"எப்பா டாப்புல எதாவது லக்கேஜ் வச்சிருக்கீயா"
"இல்லியே அண்ணே எதுவும் சாமான் இல்லையே"
"அப்படியா மேல எதோ இருக்கிறமாதிரி தெரியுதே"
அப்படியா அண்ணே என்றவாறு டிரைவரும் சிலஆட்களும் மேலே ஏறிப்பார்த்தால் ஒரு பத்து பதிமூன்று வயதில் ஒரு சிறுவன் கம்பியை பிடித்தபடி பம்மிபோய் படுத்துகிடந்தான்.

உடனே எல்லோரும் சேர்ந்து அவனை கீழே இற்க்கினர். கூட்டம் கூடிவிட்டது என்கணவர் உட்பட எல்லோரும் அந்தபையனை சூழ்ந்து கொண்டு வேடிக்கைப் பார்த்தனர். நான் பஸ்ஸில் இருந்தவாறே வேடிக்கை பார்த்தேன்.

விசாரித்ததில் அவன், அவங்க அம்மா அவனை அடித்ததால் வீட்டைவிட்டு வெளியேறி சென்னைக்கு செல்கிறானாம். உடனே அந்தபஸ் டிரைவர் அட பாவிப்பயலே எங்கேயிருந்துல ஏறினே?. அவன் மார்த்தாண்டத்திலே ஏறிவிட்டானாம். எல செத்தமூதி! எப்படில்லே பஸ் டாப்புல கிடந்தே.. ரோட்டுல எத்தனை திருப்பங்கள் இருக்கு. எவ்வளவு வேகமா வந்திருப்பேன். நான் எத்தனிதடவை பிரேக் அடிச்சிருப்பேன். செத்துக்கித்து தொலைந்திருந்தேன்னா யாருல பதில் சொல்றது. என்வண்டிதான் கிடைச்சுதா.. அண்ணே உங்களுக்கு எப்படி நன்றி சொல்றதுன்னே தெரியல.. நல்லவேளை சொன்னீங்க.. இல்லைன்னா என்கதி என்னஆகிருக்கும். என்று டிரைவர் கண்ணீர்மல்க கூறினார்.

அவனுக்கு எல்லோரும் அறிவுரைகள் சொன்னார்கள். பின்னர் டிப்போ அதிகாரிகள், அவனது வீட்டுமுகவரி தொலைபேசி எண் கேட்டு அவனது பெற்றோரை வரவழைக்கவேண்டும் என்று சொல்லிக்கொண்டிருந்தார்கள்.

எங்கள் பஸ் கிளம்பியது....


டிஸ்கி: மேலே உள்ள பஸ் படத்தில் நான் கிடையாது.., கூகிளில் தேடியது.

,

Read More

மங்களூர் விபத்தும் பெண்களும்

அன்புள்ள நண்பர்களுக்கு உங்கள் மின்மினி எழுதும் மடல்.. அனைவருக்கும் ஸலாம் சொல்லிக்கொள்கிறேன். எவ்வளோ நாளாச்சி பதிவு எழுதி.. ஆனாலும் என் தளத்துக்கு தினமும் வருகைதந்து மின்மினி இன்னக்கி எழுதுவா; நாளைக்கி எழுதுவாள் என்று தினமும் வந்தவர்களை பற்றி நினைக்கும்போது என்னை நானே திட்டிக்கொள்வேன்.

மங்களூரில் விமானவிபத்து ஏற்பட்டு 159பேர் பலி என்ற செய்தியை சனிக்கிழமை காலையில் கேட்டபோது ரொம்பவே மனசு பாதிப்பானது. வெளிநாட்டுல சம்பாதிக்க சென்றவர்கள் என்ன குற்றம் செய்தார்கள்?. எத்தனை எத்தனை பேர் ரொம்பவே ஆவலுடன் மனைவி மக்களை காண வந்திருப்பார்கள். அவர்களுக்கு நேர்ந்த சம்பவத்தை நினைக்கநினைக்க வேதனையாக உள்ளது. அவர்களின் குடும்பங்களின் நிலையை எண்ணிப்பார்த்தால்?.. இறந்தவர்களுக்கு 5 நிமிடம்தான் மரணவேதனை. ஆனால் அவர்களின் குடும்பங்களுக்கோ காலம்பூராவும் வேதனைதான்.

எப்ப என்னநடக்கும் என்று யாருக்கும் தெரியாது?.. இந்த அவசர யுகத்தில் எல்லாமே அவசரம்தான். யாருக்கும் எப்போதும் பொறுமையே இல்லை. பொதுவா வீட்டுல உள்ள ஆம்பளைங்க வெளியில் கடைவீதிக்கு சென்றால் என்ன ஆச்சோ ஏதாச்சோன்னு பதறக்கூடியவங்க நாம். அப்படீருக்கும்போது இந்தமாதிரி சம்ப‌வத்தால் பாதிப்புக்குள்ளானவர்களின் மனைவி பிள்ளைகளின் எதிர்காலம் கேள்விக்குரியானதே.. அவங்க என்ன பாவம் செய்தார்கள்?..

வெளிநாட்டுக்கு செல்லும் கணவனை தன்னோட நெஞ்சிலே சுமந்து தன் பிள்ளையை வயிற்றிலே சுமந்து கனத்த இதயத்துடன் அனுப்பிவைக்கும் மனைவியின் தியாகத்துக்கு ஈடா எதுவும் உண்டா?.. கணவன் வெளிநாடு சென்றபின் மனைவிகளுக்கு எத்தனை தூங்காத இரவுகள் உண்டு தெரியுமா?.. இந்த சூழ்நிலையில் தன்னையும் கவனித்து தன் பிள்ளைகளையும் கவனித்து குடும்பத்தினரிடையே சகஜமாக அன்னியோன்னியமாக இருந்து குடும்பத்தை கவனிக்கும் பெண்கள் எத்தனை துன்பங்களுக்கு ஆளாகிறார்கள்?..

கணவன் வெளிநாடு சென்றபின் அம்மாவீட்டுக்கும் புகுந்தவீட்டுக்கும் மாறிமாறி ஏதோ வனவாசம் செல்வதுபோல அங்குமிங்கும் செல்லும் பெண்களின் நிலை?.. இதில் அவர்களுக்கு குழந்தைகள் இருந்தால் அவர்கள் குழந்தையை கவனிப்பதில் நேரத்தை செலவிடுவார்கள். ஆனால் குழந்தை இல்லா பெண்கள்?...


இப்படி ஒவ்வொருத்தருக்கும் எவ்வளவு எதிர்பார்ப்புகள்? எல்லாம் கேள்விக்குரியானது என்று நினைக்கும்போது வருத்தமாக உள்ளது.

எல்லாம் வல்ல இறைவன் அவர்களுக்கு மனநிம்மதியையும் நல்ல சூழ்நிலையையையும் தருவான் என்று அனைவரும் பிராத்திப்போமா.. ஆமீன்.

விபத்தில் இறந்த‌வர்களின் குடும்பங்களுக்கு என் ஆழ்ந்த அனுதாபங்கள்., கண்ணீர் அஞ்சலிகள்.

,

Read More